OBRIGAS DAS EMPRESAS COMERCIAIS CON PÁXINA WEB DE COMERCIO ELECTRÓNICO
Guía resumo das obrigas esenciais que rexen nas tendas en liña.
Este espazo reúne de forma clara e práctica as principais obrigas legais que deben cumprir as tendas en liña en España e na Unión Europea. A información está baseada na normativa vixente e nas documentación oficial aportada pola Dirección Xeral de Comercio da Xunta de Galicia sobre comercio electrónico .
Para facelo máis sinxelo, contámosche:
o que se debe ver na túa web, o que debes ter en conta no momento da venda e o servizo posvenda.
1. O que debe mostrar a túa web (Transparencia)
Antes de que un cliente compre, a lei esixe que determinada
información estea sempre visible e accesible, habitualmente no pé de páxina (footer) do teu sitio web:
·
Aviso Legal: Debes identificarte claramente. É
obrigatorio mostrar o nome do propietario ou razón social da empresa, o NIF, o
enderezo físico, un correo electrónico de contacto e, se estás inscrito, os
datos do Rexistro Mercantil.
·
Política de Privacidade (RGPD): Tes que explicar de
forma sinxela que fas cos datos dos clientes. Quen os garda, para que se usan
(tramitar o pedido, enviar publicidade), durante canto tempo e como poden
exercitar os seus dereitos de acceso, rectificación ou cancelación.
·
Política de Cookies: Non podes instalar cookies
de seguimento sen o permiso do usuario. É necesario un panel onde o visitante
poida aceptar, configurar ou rexeitar as cookies antes de navegar.
·
Condicións Xerais de Contratación: Son
as "regras do xogo" da túa tenda. Deben explicar de forma clara os
prezos (se inclúen ou non o IVE), as modalidades de pago, os prazos de entrega
e canto custan os gastos de envío.
2. Durante o proceso de compra (Dereitos no Checkout)
No momento en que o cliente decide adquirir un produto ou
servizo, o proceso de compra debe guialo sen confusións:
· Botón de pago inequívoco: O botón final que confirma o
pedido debe indicar claramente que a acción implica pagar. Utiliza textos como "Comprar agora", "Pagar pedido" ou "Confirmar e pagar". Evita fórmulas ambiguas
como "Continuar" ou "Seguinte".
· Dereito de Desistimento (Devolucións): Por
lei, o consumidor ten un prazo mínimo de 14 días naturais para devolver o produto sen necesidade
de xustificación. Tes a obriga de informalo deste dereito e de facilitarlle un
formulario sinxelo para exercer a devolución. (Nota: Existen excepcións como produtos personalizados, bens
perecedoiros ou artigos de hixiene).
· Garantías dos produtos: Lembra que en España os
produtos físicos novos teñen unha garantía legal de 3 anos, mentres que os contidos ou servizos dixitais
contan con 2 anos de garantía.
3. Despois da venda (Posvenda e Reclamacións)
O proceso non remata cando o cliente paga; a normativa esténdese
ao soporte posterior:
· Confirmación do pedido: Debes enviar de forma
automática un correo electrónico co xustificante e o resumo detallado da compra
nun prazo máximo de 24 horas.
· Atención á Clientela: De acordo coa normativa
vixente, debes poñer á disposición dos usuarios canles de comunicación eficaces
(correo electrónico ou teléfono) para resolver dúbidas ou incidencias de forma
áxil.
· Resolución de Litixios en Liña (ODR): Como tenda en liña na Unión Europea, estás obrigado a incluír na túa web un enlace visible á plataforma de resolución de conflitos en liña da Comisión Europea. Isto permite resolver reclamacións de consumo de forma amistosa e sen necesidade de ir aos tribunados.
NORMATIVA DE APLICACIÓN:
Normativa da Unión Europea
- Directiva
2011/83/UE sobre dereitos das persoas consumidoras.
- Directiva
2000/31/CE sobre comercio electrónico.
- Directiva
2005/29/CE sobre prácticas comerciais desleais.
- Directiva
(UE) 2019/770 sobre contidos e servizos dixitais.
- Directiva
(UE) 2019/771 sobre garantías de bens.
- Regulamento
(UE) 1215/2012 sobre competencia xudicial.
- Regulamento (UE) 2016/679 (RGPD) sobre protección de datos.
Aínda tes dúbidas?
Se es asociado da Asociación de Empresas de Redondela, lembra que tes ao teu dispor o noso Servizo de Asesoramento Técnico. Axudámoste a revisar que a túa páxina web cumpra ao 100% coa legalidade vixente.
