O DIRECTOR XERAL DE COMERCIO DESTACA EN REDONDELA OS VALORES DOS BONOS ACTIVA COMERCIO DURANTE A ENTREGA DOS PREMIOS DA CAMPAÑA DO DÍA DA NAI E DO PAI

A Asociación manifesta o seu agradecemento as máis de 200 deportistas locais que participaron na exposición Elas Xogan.

Redondela volveu xuntar ao comercio local para a entrega dos premios da Campaña do Día da Nai e do Pai 2026, organizada pola Asociación de Empresarios de Redondela (AER). Un acto que puxo en valor a forza da colaboración institucional e no que o director xeral de Comercio da Xunta de Galicia, Gabriel Alén, avanzou a próxima posta en marcha dunha nova edición dos Bonos Activa Comercio, unha das medidas máis esperadas polo sector.

O evento contou tamén coa presenza do concelleiro de Emprego do Concello de Redondela, do presidente da Federación Provincial de Comercio de Pontevedra e da Xunta Directiva da AER, evidenciando unha vez máis a importancia da cooperación entre administracións e entidades empresariais para fortalecer o tecido económico local.

As persoas premiadas nesta edición foron María Barciela (Doble L), Alex Alejandra Martínez (Las Cositas de Rouss), Geni Couñago Moreira (SML) e Conchi Vidal Gómez (Mercería Xeitosiña), todas elas recoñecidas co premio dunha camiseta oficial do seu equipo favorito tras validar correctamente os seus tickets na plataforma Participa!.

Campañas para impulsar a interacción social do comercio e da clientela local

Baixo o lema “Xoga polo que cres. Aposta polo comercio local”, a campaña do Día do Pai destacou polo seu enfoque innovador, inspirado no universo deportivo como símbolo de esforzo, compromiso e identidade comunitaria, e tivo continuidade durante a Campaña do Día da Nai, que contou con diversas actuacións e iniciativas.

As persoas que realizaron compras durante o período das campañas puideron participar no sorteo dunha camiseta oficial do seu equipo favorito, rexistrando os tickets na plataforma Participa!. A campaña mobilizou máis de 9.000 boletos de participación dixital.

Durante a campaña, o deporte feminino tomou os escaparates coa exposición urbana “Elas Xogan”

Entre o 30 de abril e o 30 de maio, os comercios participantes acollen a exposición “Elas Xogan”, unha mostra que pon en valor as xogadoras dos equipos femininos de Redondela e o talento deportivo de base. A iniciativa transforma as rúas nun percorrido visual que reivindica o esforzo, a constancia e a paixón das deportistas que constrúen o deporte desde abaixo.

Recoñecemento á clientela local

Durante o acto, a AER agradeceu a implicación cidadá e a participación das máis de 200 xogadoras dos clubs e equipos locais que forman parte da exposición.