A PRAZA DE ABASTOS DE REDONDELA PRESENTA A SÚA I FESTA DE PRIMAVERA, UNHA HOMENAXE Á HISTORIA DOS MERCADOS LOCAIS
Un evento organizado pola Asociación de Empresarios de Redondela e a Asociación Alvedosa que enche a Praza de Abastos de actividade, tradición e participación coincidindo co Día dos Mercados.
A Praza de Abastos de Redondela xa comeza a vestir as
cores de primavera coa instalación das primeiras decoracións da I Festa de
Primavera, un evento promovido pola Asociación de Empresarios de Redondela
co apoio da Xunta de Galicia e do
Concello, que converterá o mercado nun espazo cheo de vida, tradición e
actividade comercial.
A presentación oficial contou coa presenza do director
xeral de Comercio, Gabriel Alén, quen destacou “o papel esencial das prazas
de abastos como motor económico, punto de encontro social e símbolo da
identidade das vilas galegas”. Subliñou tamén o compromiso da Xunta co impulso
do comercio de proximidade e coa modernización dos mercados tradicionais.
Unha festa para
celebrar a historia dos mercados de abastos e o comercio local
A edición inaugural da Festa de Primavera está dedicada á
historia das Prazas de Abastos de Redondela, cunha programación pensada
para todos os públicos e orientada a dinamizar o mercado, recoñecer o seu valor
patrimonial e fomentar as compras nos postos locais.
Entre as actividades previstas destacan:
- Premios
e agasallos especiais para o público asistente
- Concursos
e sorteos ao longo da mañá
- Promocións
exclusivas nos postos da Praza
- Ambientación
musical e atmosfera festiva
- Degustacións
de produtos locais
- Xogos
infantís e actividades creativas para as crianzas
Ademais, o público poderá visitar a exposición “A
Historia dos Mercados”, un percorrido pola evolución arquitectónica, social
e económica das prazas de abastos de Redondela, que pon en valor o seu papel
como espazo de convivencia e dinamización comercial.
E o sábado contarase cunha sesión vermú co típico pulpeiro no espazo exterior da Praza de
Abastos.
SELADO DA TARXETA DE
CLIENTE para participar no Xogo da Ruleta
Dende o día 20 e ata o día 30 de maio, os praceiros e
praceiras están repartindo entre todas as persoas clientes as tarxetas de
cliente, nas que se poden acumular selos polas compras e participar no popular Xogo
da Ruleta, con numerosos agasallos e sorpresas.
Horarios da ruleta:
- Venres
29: 11:00h–11:30h e 12:00h–12:30h
- Sábado
30: 12:00h–12:30h e 13:00h–13:30h
Un espazo para a
infancia
O sábado 30, a Praza converterase tamén nun espazo de
descubrimento para os máis pequenos, con xogos tradicionais, unha gincana
para coñecer o mercado e un taller creativo de delantais.
Declaración institucional
Desde a Asociación de Empresas de Redondela sublíñase que esta iniciativa “busca reforzar o vínculo entre a cidadanía e o comercio local, poñendo en valor a historia das nosas prazas de abastos e ofrecendo unha xornada festiva, participativa e aberta a toda a vila”. A entidade anima a toda a veciñanza a sumarse á celebración coincidindo co Día dos Mercados, que se conmemora precisamente este sábado 30 de maio, motivo polo que a Festa de Primavera se fai coincidir con esta data tan significativa para o comercio de proximidade.