REDONDELA ACOLLE UNHA XORNADA CLAVE PARA IMPULSAR PROXECTOS DE ECONOMÍA AZUL VINCULADOS AO SECTOR PESQUEIRO E Á DIVERSIFICACIÓN LOCAL

A Asociación de Empresas de Redondela acolleu este mércores unha xornada informativa sobre a nova convocatoria de axudas do Fondo Europeo Marítimo, de Pesca e de Acuicultura (FEMPA), organizada polo GALP Ría de Vigo-A Guarda en colaboración coa Consellería do Mar e o Concello de Redondela.

O acto contou cunha ampla participación institucional e empresarial, destacando a intervención da Alcaldesa de Redondela, Digna Rivas, que subliñou o compromiso do municipio co desenvolvemento sostible e a economía azul. Tamén estiveron presentes o Alcalde de Nigrán, Juan González, e o Concelleiro de Promoción Económica de Soutomaior, Óscar Rodríguez, reforzando a dimensión comarcal da xornada e o interese compartido en aproveitar os recursos do FEMPA.

A Asociación de Empresas de Redondela, como entidade anfitrioa e promotora local, puxo en valor a oportunidade que supón esta convocatoria para dinamizar o tecido económico vinculado ao mar, á gastronomía e ao turismo, e facilitar a diversificación de actividades no entorno costeiro.

Durante a sesión, presentáronse as liñas prioritarias da convocatoria 2026 (procedemento PE155A), que contempla 6,9 millóns de euros en axudas para Galicia, cofinanciadas nun 70 % polo FEMPA e nun 30 % pola Xunta de Galicia. Os proxectos subvencionables deberán fomentar a creación de emprego, a participación das mulleres, a atracción de mocidade, a innovación na cadea de valor pesqueira, a diversificación económica e a valorización do patrimonio marítimo.

Redondela, como parte da zona GALP Ría de Vigo-A Guarda, destaca pola súa industria pesqueira, conserveira e loxística, así como polo seu dinamismo empresarial. A estratexia EDLP 2021–2027 contempla accións específicas no municipio para impulsar a economía azul e fortalecer o desenvolvemento da empresas trasformadoras de productos do mar así como calquera outra actividade empresarial que supoña a diversificación do ecosistema productivo vinculado ao territorio costeiro.

A xornada rematou cun espazo de networking entre os asistentes, no que presentaron as súas experiencias na presentación e xestión de proxectos do Circulo Recreativo e Cultural de Chapela cunha intervención no pantalán e a Confraría de Pescadores de Redondela cuxo proxecto consistiu na adquisión dunha furgoneta eléctrica para a comercialización de productos do mar. Este networking realizouse  co obxectivo de  compartir ideas, establecer sinerxías e resolver dúbidas técnicas sobre a presentación de proxectos. A organización valorou moi positivamente a participación institucional e empresarial, sinalando que Redondela está preparada para liderar iniciativas transformadoras no marco da economía azul galega.