A PRIORIDADE DA ASOCIACIÓN DE EMPRESAS É EVITAR QUE O COMERCIO DE REDONDELA PERDA O MAIOR EVENTO DA SÚA HISTORIA TRALA NEGATIVA MUNICIPAL A USAR O APARCAMENTO DE VILAVELLA

A negativa da administración local a autorizar o espazo do aparcamento de Vilavella obriga á entidade a reformular, fragmentar e redimensionar un proxecto avalado pola Xunta de Galicia polo seu rigor técnico.

A Asociación de Empresas de Redondela lamenta profundamente a decisión do Concello de non autorizar o emprazamento previsto no estacionamento de Vilavella para o desenvolvemento da campaña extraordinaria REDONDELA NO CAMIÑO. Esta iniciativa, aprobada pola Xunta de Galicia para o Centro Comercial Aberto, supuxo un gran recoñecemento ao estar entre os 5 proxectos con mellor puntuación técnica de toda Galicia. A negativa municipal obriga agora a reformular un proxecto concibido tras meses de planificación detallada e visión estratéxica.

REDONDELA NO CAMIÑO: Un proxecto con raíz histórica e estratéxica

Presentada aos establecementos na asemblea extraordinaria do 14 de setembro —onde se amosaron infografías detalladas coas ideas e deseños previstos—, a campaña nacía como unha evolución da tradicional Feira de Oportunidades cara a unha GRAN FEIRA MULTISECTORIAL nun único emprazamento.  A elección de Vilavella como epicentro non foi casual nin improvisada.

A marca Redondela no Camiño vai moito máis alá de ser un punto de encontro das variantes do Camiño Portugués (Central e da Costa): quere destacar o papel fundamental que todos os camiños históricos de Redondela (prehistóricos, romanos, medievais, marítimos, fluviais e ferroviarios) tiveron durante máis de 2.000 anos na configuración económica, urbana e comercial da vila. Neste contexto, Vilavella como punto de unión dos camiños e porta de entrada sur ao Centro Comercial Aberto e o relato histórico de Vilavella e Vilanova representaba o escenario idóneo.

Na asemblea detalláronse as outras actuacións que conforman o proxecto, así, ademais da Feira Comercial e a Ruta Comercial, a iniciativa inclúe a exposición «Redondela: A historia da vila comercial» —unha mostra ao aire libre na Praza de Ponteareas para divulgar a evolución do comercio local mediante fotografías históricas, paneis e elementos patrimoniais— e o «Pasaporte Comercial», deseñado como un folleto de promoción con visados e para fidelizar á clientela, xunto con outras actividades que agora deberán ser reconfiguradas.

 

 

Negociacións infrutíferas .

A pesar da sólida fundamentación técnica presentada o Concello alegou que o solo non está adaptado, que o evento podería molestar aos veciños, que se perderían prazas de aparcamento, que non existe potencia eléctrica suficiente e que a futura colocación dunha ponte sobre o río podería interferir na celebración. A Asociación considera que todos estes argumentos son solventables desde un punto de vista técnico. Así consideramos que: as estruturas previstas non requiren ancoraxes agresivas e suxéitanse con pesos, tal e como temos feito en outros moitos eventos  que celebrados en prazas con solos de pedra sen causar dano. A potencia eléctrica puido ser planificada desde marzo e, en todo caso, é totalmente emendable mediante xeradores. As alternativas de aparcamento estaban previstas e comunicadas, e a convivencia co entorno é compatible xa que se trata evento diúrno de carácter cultural e comercial nun espazo recentemente humanizado que a cidadanía está chamada a redescubrir. En canto á obra do ponte, non está a restar espazo significativo e a súa finalización en prazo engadiría valor ao emprazamento inicialmente planificado ao permitir comunicar coa outra marxe do río e tamén con zonas susceptibles de ser usadas como aparcamento. O único contrapunto podería ser a distancia coa zona central, o cal podería restar certa capacidade de interacción co núcleo comercial. Pero consideramos a configuración do evento tamén favorecería a interacción comercial co resto da oferta da vila.

 

Reconfiguración e novas datas.

A pesar da frustración xerada e de que esta resolución bota por terra parte do labor estratéxico realizado, a asociación actúa con responsabilidade e acata a decisión municipal co único obxectivo de evitar que o comercio local perda unha axuda a unha campaña tan destacada. E matiza que o único acordo adoptado na mesa de comercio foron as datas sen facer referencia ao emprazamento.

A entidade atópase xa traballando a contra o reloxo —pendente de confirmar a dispoñibilidade dos provedores— para encaixar a campaña nunha das datas aprobadas pola Mesa Local de Comercio, previsiblemente os días 22 e 23 de outubro, co fin de evitar coincidencias coa festas da histórica Batalla de Rande.

  

A Asociación de Empresas de Redondela reafirma a súa disposición a seguir colaborando coas administracións, pero reclama con firmeza altura de miras cara ao comercio de proximidade, motor indiscutible da nosa vila.